La França vira a dreita

Desfaita daus socialistas

Abei un tax d’abstencion augmentat de viament cinc puents – l’ei passat dau 33,46% au 38,72 respecte a las presidencialas -, le second torn de las municipalas francesas de mars confirma la tendencia dau primier: la França se tinhís de blau, le Front National avança e los socialistas arreiron considerablament. Se los socialistas arribon a servar París ont Anne Hidalgo ven la primiera femna consol de la capitala en battent la rivala de l’UMP Nathalie Kosciusko-Morizet – las listas de la primiera obtenon le 53,3% contra le 44,06 de la seconda en permetent a la gaucha d’aguer una majornaça de 91 conselhiers contra los 71 de l’UMP-UDI –, l’UMP ganha dins fòrça de comunas en n’en arranchant au PS un numre considerable.

En nos concentrant sus le vot dau sud, a Marselha 7 circoscripcions sus 9 son anaas a l’UMP – e una au FN – en permetent au consol sortent Jean-Claude Gaudin d’èsser reelegit abei un resultat de 61 conselhiers sus un total de 101: s’ei realizaa parier la plus fòrta majorança au conselh comunal dempuei le 1992. Le FN abei Stéphane Ravier l’a obtengut 21 conselhiers en n’en laissant au PS de Patrick Mennucci masque 18.

En general tota la Provença, exceptat que pas gaire de cas, l’a vist ganhar l’UMP e avançar le FN. A Tolon le consol sortent Hubert Falco l’ei istat reelegit au primier torn abei un 59,26% obtengut per sa lista Union de la droite; second le FN abei le 20,47%. La lista Union de la gauche obten masque le 10,11%. Mai Niça se reconfirma a dreita: dins le quadrangular dau second torn, la lista Union de la droite de Estrosi l’a ganhat abei le 48,61%; seguisson le FN abei le 21,10%, la lista Union de la gauche que deipassa pas le 17,84% e la lista localista Mon parti c’est Nice que obten le 12,42. Passa aus socialistas Avinhon ont le triangular entre PS, UMP e FN favoris los primiers apres un primier torn qu’avia vist le FN en legier avantatge. A Aurenja ganha au primier torn la Ligue du Sud, pròcha au FN, abei viament le 60% de las preferenças dau temps que a Ais l’UMP per ganhar deu atendre le second torn, un triangular abei los socialistas e le FN. Ganha la dreita a Nimes, Menton e Barcilona de Provença.

Dins le Lengadòc, l’UMP obten la ville rose Tolosa ont son candidat Jean-Luc Moudenc, abei le 52,06% e 53 elegits bat, dins un second torn a doi, le consol socialista sortent Pierre Cohen que dins le 2008 s’era impausat abei le 50,42% e que ara se planta au 47,93% e a 16 consilhiers comunaus. Montpelhier se confirma a gaucha mai se abei un chanjament: le consol socialista sortent l’ei resultat batut per un independent de gaucha. A Limós la lista Union de la gauche de socialistas e comunistas ganha facilament au primier torn abei le 51,88%, en confirmant la tendença politica de la vila lengadociana. La dreita aicí deipassa pas le 36,75% dau temps que l’11,36% vai au Parti de Gauche de Mélanchon. A Besièrs ganha le FN.

A Pau François Bayrou de l’Union du Centre ganha au second torn abei le 62,95% sus le candidat socialista sortent. A Bordeu Alain Juppé de l’UMP pòrta sa lista a ganhar abei le 60,94% au primier torn dau temps que a Clarmon la lista Union de la Gauche de socialistas e comunistas bat dins un triangular l’UMP e le FN. Passa aus gaullistas mai Limòtges qu’avia un consol socialista dau 1912.

 

Factors proceduraus

Las eleccions municipalas en França se debanon chasque seis ans contemporaneament per totas las comunas. Los representants venon elegits abei de sistemas electoraus diferents a seconda que se tracte d’una comuna granda, meiana o pechita. Totun substancialament le sistema adoptat l’ei un proporcional abei premi de majorança per la lista ganhanta.

D’un caire mai en França las politicas municipalas perdon de plus en plus competencias e poer real - sobretot a causa daus talhs a las comunas – e se pòion limitar a realizar la normala administracion institucionala. De l’autre las elecions municipalas l’an totjorn una directa rechauta sus la politica nacionala – e per aiquen absumisson una rilevanta importança – dau moment que le Senat ven elegit pas directament per le pòple mas pels elegits de qualsevuelhe livèl institucional, donca mai per los environ 208mila noveus conselhiers municipaus.

D’aicestos 208mila, 98mila son de l’UMP o de la dreita republicana, 34mila se declaron indipendents – son los elegits de las pechitas comunas dins de listas pas referiblas directament a un partit politic mas que l’an principalament de posicions pròchas a la dreita – e 8mila aus centristas que venon de se desluenhar daus socialistas. Masque 67mila fan referença aus socialistas. L’ei clar qu’abei de numres parierfaits s’impausaren consequencias sus la politica a livèl nacional.

 

L’avançaa dau Front National: un resultat que deu pas eitonar

L’ei inegabla l’avançaa dau Front National. La formacion de Marine Le Pen arriba a èsser presenta au second torn dins 229 comunas e l’a elegit 11 consols –  3 son de la Ligue du Sud e dins doas comunas, Henin Baumont e Aurenja, son istats elegits au primier torn – e la presidença d’una circoscripcion de Marselha. L’avançaa dau FN l’ei plus fòrta dins le sud, particularament en Provença, e dins le nòrd deindustralizat. Aiceste succes l’ei segurament a far remontar d’un caire au regecte de l’austerity de Hollande, de l’autre aus escàndols financiari de l’UMP. Aquel au FN, mai mercés a la linha dau PCF subalterna au PS, ven apercebut coma le solet vot antisistema, le solet vot de protèsta. La linha de dura opausicion parlamentara e la retorica antieuropenca e nacionalista, contra la politica, las bancas e l’immigracion l’an fait bèrcha dins un electorat fatigat a causa de la crisi.

Tots crion au pericle fascista. En realitat aiceste l’ei un resultat que deu pas eitonar. Aiceste l’ei istat un vot que l’a condamnat la politica reformista dau socialista Hollande que jà, abei le Pacte de responsabilitat, avia donat 50 miliard au patronat en talhant los servicis sociaus e que ara, coma responsa aus resultats electoraus, l’a portat son governe encara plus a dreita en nomant primier ministre Manuel Valls, ex ministre daus internes. De son caire le PCF paia sa linha ondivaga que l’a portat a se presentar en aliança abei los socialistas dins la meitat de las comunas abei plus de 20mila abitants en laissant solet le Parti de la Gauche de Mélanchon – que fòrça de còps s’ei coalizat abei Euròpa Ecologia o abei le Novel Partit Anticapitalista (NPA) – e coma Front de Gauche dins l’autra meitat.

Aicesta estrategia d’axe abei le PS avia l’obiectiu de evitar le plus possible l’erosion dau numre daus pròpres consols e conselhiers municipaus – obiectiu antepausat au manteniment de son implantacion sociala – mas que s’ei deivelaa perdenta (le PCF l’ei en efeit passat de 358 a 264 consols)  en laissant que FN fosse la soleta foça politica a apareisse pas associaa au poer.