Los vins en Val Dueira

En Val d’Ols la viticultura a originas ben ancianas e ’tjorn a rapresentat una votz importanta dins l’economia agricola de la valeia. En efècte la vitz era jà coltivaa en epoca romana e le vin era comercializat en tot l’Emperi, sustot dins las Gaulas. L’economia dau sector dau vin de la valeia a alternat, dins los sècles, moments de vigor a-n-autres de crisi. Entre los periòdes de plus grand desvolopament avem agut los sècles entre le 1200 e le 1400 e dau 1700 aus premiers ans dau 1900. Après, la guèrra, la diminucion demografica causaa de las epidemias d’espanhòla e la filossera, an causat la decadéncia.

Dins los darriers ans, la viticultura en Val d’Ols, a augut tòrna d’impulsion, mai merces a l’empenhe de novellas impresas de vinificacion qu’an garantit la recuperacion de las vielhas vinhas incultas per l’interès de las institucions localas e de l’Universitat de Turin. Cesta novella impulsion a fait obtenir excellents niveus quantitatius e l’obténiment dins le 1997 de la Denominacion de Origina Controtlaa de nòstres vins.

La vitz tipica de la Val d’Ols, o Val de la Dueira coma se podria mai demandar, l’ei segurament l’Avanat. Comunament considerat coma vin local, a d’oríginas ben ancianas e pas gaire certas. Se tracta d’una vitz que se presta a la coltivacion sus los bariòus qu’an ‘tjorn caracterizat nòstras vinhas. La raison l’ei que la planta accepta de creisser en de condicions d’extrema ariditat. En cesta valeia trobem mai autras vitz coma le Barbera, le Dòucet e le Bicuet.

Las principalas impresas de vinificacion de la Val d’Ols se troban a Chaumont e sas vinhas, compresas las de sa fracion de las Ramaas, son plus autas qu’aquelas dau Piemont e se troban plus o menc a la meima autessa qu’aquelas de la restant part dau Daufinat occitan.